Tres poemas
1904, 1922 e 1933
IERRU https://youtu.be/p1aeTvFiVhU
Carrigu de nieddas temporadas
Benit s’ierru, bezzu, tristu e canu,
E senz’ervas est tristu su pianu,
E sas forestas pàrene brugiadas.
Non puzzones c’allegren su manzanu
Cun sas milli pibias delicadas,
Su entu muinat intro sas foradas
E tristos colvos cantan a luntanu.
Gai est s’umanu istadu; rie rie
Fuit s’amare, fuit su cuntentu;
Passat de zuventude cudda die
Coment’una die ’e majiu senza entu.
Ma su dolore, simile a su nie
Falat continu frittu e lentu lentu.
Boghes de Barbagia, 1904
EST UNA NOTTE ´E LUNA
Est una notte ‘e luna,
De cuddas lunas de atonzu giaras,
Chi cando tue t’acciaras
A la ‘ider’andare,
Isperas novamente in sa fortuna.
Hat piòpidu tantu
Tottu sa die. Pariat sa terra
In s’adde e in sa serra,
Tra sos fenos siccados,
Bestida de antighissimu piantu.
Ma ecco in su serenu
Avanzare sa notte; giaru chelu
Risplendere; e che velu
De isposa, sa luna,
Bestit de biancore onzi terrenu.
Cantigos d´Ennargentu, 1922
IT’EST SA POESIA?
It’est sa poesia?… Est sa lontana
Bell’immagine bida e non toccada,
Unu vanu disizu, una mirada,
Unu ragiu ’e sole a sa fentana,
Unu sonu improvisu de campana,
Sas armonias d’una serenada
O sa oghe penosa e disperada
De su entu tirende a tramuntana.
It’est sa poesia?… Su dolore,
Sa gioia, su tribagliu, s’isperu,
Sa oghe de su entu e de su mare.
Sa poesia est tottu, si s’amore
Nos animat cudd’impetu sinceru,
E nos faghet cun s’anima cantare.
Sos cantos de sa solitudine, 1933